បើ Lee Min Ho បានឭសូរចម្លើយ Suzy ក្នុង​ពេល​នាង​ស្រវឹង​​មិន​ដឹង​ជា​អន់​ចិត្ត​យ៉ាង​ណា​ទេ!

ដោយមានវត្តមានលោកសុរ៉ាជាជំនួយជួយឱ្យទន់អណ្តាតរអិលមាត់ Suzy ស្រាប់តែភ្លាត់និយាយរឿងខ្លះដែលពីមុនគ្មានអ្នកធ្លាប់ដឹងសោះ ឱ្យគ្រប់គ្នាដឹងពេលនេះតែម្តង។ ក្នុងកម្មវិធីកម្សាន្តមួយឈ្មោះ "Off The Record" Suzy បានជួបជាមួយនឹងមិត្តជិតស្និទ្ធរបស់នាង ៣ នាក់។ ជាធម្មតា Suzy អាចផឹកស្រា Soju អស់តែកន្លះដបតែប៉ុណ្ណោះទេ។ តែថ្ងៃនោះ នាងបែរជាប្រាប់គេថានាងអាចផឹកអស់ ២ ដបដោយមិនស្រវឹង ហើយមុខនាងថែមទាំងមិនឡើងក្រហមថែមទៀតផង។

ពួកគេក៏ចាប់ផ្តើមផឹករហូតដល់ Suzy សារភាពថានាងស្រវឹងហើយ។ ពេលនោះនាង និងមិត្តភក្តិក៏នាំគ្នាលេងល្បែងមួយដែលអ្នកចាញ់បើគេសួរអីគឺត្រូវតែឆ្លើយប្រាប់ការពិតដោយមិនកុហក។ តែបើមិនចង់ឆ្លើយក៏បាន តែត្រូវផឹកទៀត។ ពេលសួរថា "តើ Suzy ថើបគ្នាជាលើកដំបូងនៅពេលណាដែរ?" ពេលនោះព្រោះតែឆ្លើយមិនរួច Suzy ក៏ត្រូវពិន័យមួយកែវទៀត។

សំណួរបន្ទាប់សួរថា តើ Suzy ចូលចិត្តបុរសប្រភេទណាដែរ? នាងឆ្លើយវិញថា ពីមុននាងចូលចិត្ត Ian Somerhalder តែពេលនេះនាងងាកមកចូលចិត្តបុរសដែលមានសាច់ដុំធំៗដូចជា Choo Sung Hoon ជាដើម ព្រោះបុរសប្រភេទនេះអាចការពារនាងបាន។ ចម្លើយនេះបើសិនជា Lee Min Ho បានឭប្រហែលជាឈឺចាប់ស្លាប់ហើយមើលទៅ ព្រោះប្រភេទបុរសដែល Suzy ចូលចិត្តបែរជាគ្មានរូបខ្លួនសោះតែម្តងហើយ។ ភាគច្រើនគេថាមនុស្សស្រវឹងពិតជាឆ្លើយអីដោយមិនកុហកទេ កាលនោះ Suzy ពិតជាស្រវឹង នេះមានន័យថាតើក្នុងចិត្តនាងពិតជាគ្មាន Lee Min Ho មែន ឬក៏យ៉ាងណា?

ប្រភព៖ ព័ត៌មានកូរ៉េ