អុញនោះ! ដូណាល់ ថ្រាំ ចង់​ជួប ហើយថែម​ទាំង​សរសើរ​គីម ជុងអ៊ុន ថា​ជា​មនុស្ស​ឆ្លាត​ម្នាក់​ថែម​ទៀត​ផង!

កាលពីថ្ងៃចន្ទ ម្សិលមិញនេះ លោកប្រធានាធិបតីអាមេរិកដូណាល់ ថ្រាំ បានថ្លែងដោយផ្ទាល់ក្នុងបទសម្ភាសន៍មួយថា បើអាច លោកនឹងជួបផ្ទាល់ជាមួយនឹងមេដឹកនាំផ្តាច់ការរបស់កូរ៉េខាងជើង គីម ជុងអ៊ុន តែម្តង។ ដូណាល់ ថ្រាំ៖ "បើសិនជាមានពេលវេលាសាកសមណាមួយតម្រូវឱ្យខ្ញុំជួបជាមួយគីម ជុងអ៊ុន នោះខ្ញុំនឹងជួបជាមួយគេ។" ដូណាល់ ថ្រាំ ថែមទាំងបានបន្ថែមទៀតថា៖ "ជាទូទៅ អ្នកនយោបានភាគច្រើនពិតជាគ្មាននរណាដែលនិយាយបែបនេះដូចខ្ញុំទេ តែខ្ញុំប្រាប់ថា បើមានកាលៈទេសៈសមរម្យណាមួយ នោះខ្ញុំពិតជានឹងជួបគ្នាជាមួយគីម ជុងអ៊ុន។"

ក្រៅពីបង្ហាញពីចេតនាចង់ជួប ដូណាល់ ថ្រាំ ក៏បានសរសើរដល់គីម ជុងអ៊ុន ដែលជាមេដឹកនាំផ្តាច់ការក្មេងចិត្តមុតជាងដាវសាមូរ៉ៃរបស់ជប៉ុនផងដែរ។ ដូណាល់ ថ្រាំ ថាគីម ជុងអ៊ុន ជាមនុស្សដែលឈ្លាសវៃម្នាក់។ សរសើរប្អូនប្រុសមិនអស់ចិត្ត ដូណាល់ ថ្រាំ ថែមទាំងសរសើរលោកប្រធានាធិបតី វ្លសាឌីមៀ ពូទីន ដែនជាបងប្រុសដែលតែងឈរនៅពីក្រោយកូរ៉េខាងជើងផងដែរ។ ក្រៅពីនេះ មានមេដឹកនាំល្បីៗជាច្រើនរូបទៀតដែលទទួលបានការសរសើរពីដូណាល់ ថ្រាំ ផងដែរ។ នេះអាចបញ្ជាក់ឱ្យឃើញថា បើកូរ៉េខាងជើងហ៊ានបន្ទន់ឥរិយាបថតែបន្តិច នោះអ្វីៗពិតជានឹងអាចនិយាយគ្នា និងដោះស្រាយបានដោយស្រុះស្រួលជាមិនខាន៕

ប្រភព៖ huffingtonpost