អាមេរិក៖ "កុំចេះតែហ៊ានល៎លេងជាមួយអាមេរិក!" កូរ៉េខាងជើង៖ "ហ៊ានតែបាញ់កូរ៉េ កូរ៉េបាញ់ខ្មាស់គេវិញឥឡូវហើយ!"

ថ្វីបើស្ថានការណ៍រវាងកូរ៉េខាងជើង និងសហរដ្ឋអាមេរិកកំពុងតែតានតឹងយ៉ាងណាក៏ដោយ ហើយបើទោះបីជាសហគមន៍អន្តរជាតិមានការខ្វល់ខ្វាយក្នុងកម្រិតខ្ពស់មួយខា្លចថាសង្គ្រាមលោកទី៣ នឹងកើតមានក៏ពិតមែន តែលោក Han Song-ryol ដែលជាអនុរដ្ឋមន្ត្រីការបរទេសរបស់កូរ៉េខាងជើងបានផ្ញើរសារជាដំណឹងក្នុងបទសម្ភាសន៍មួយជាមួយនឹងអ្នកកាសែតរបស់ទូរទស្សន៍ BBC ថា ខ្លួននៅតែបន្តបាញ់សាកល្បងមីស៊ីលប្រចាំសប្តាហ៍ ប្រចាំខែ និងប្រចាំឆ្នាំជាបន្តទៀត។

មន្ត្រីជាន់ខ្ពស់រូបនេះក៏បានបន្ថែមទៀតថា សង្គ្រាមស៊ីសាច់ហុតឈាមមួយនឹងកើតឡើង បើសិនជាអាមេរិកហ៊ានចាត់វិធានការយោធាណាមួយមកលើខ្លួន។ ចំណែកលោកអនុរដ្ឋមន្ត្រី Mike Pence របស់សហរដ្ឋអាមេរិកក៏បានព្រមានកូរ៉េខាងជើងកាលពីមុននេះផងដែរថាកុំ​​​​ឱ្យកូរ៉េខាងជើងចេះតែហ៊ានល៎លេងជាមួយនឹងសហរដ្ឋអាមេរិកឱ្យសោះ។ ដោយលោកបន្ថែមទៀតថា ការអត់ធ្មត់របស់អាមេរិកទៅលើកូរ៉េខាងជើងជារឿងហួសសម័យមួយហើយ។ នេះមានន័យថាអាមេរិកពិតជាលែងទ្រាំថាំចិត្តជាមួយនឹងកូរ៉េខាងជើងទៀតហើយ។

លោកអនុរដ្ឋមន្ត្រីអាមេរិកខាងលើបានធ្វើដំណើរមកដល់កូរ៉េខាងត្បូងដែលជាសម្ព័ន្ធមិត្តកាលពីថ្ងៃអាទិត្យ ប៉ុន្មានម៉ោងមុនការបាញ់មីស៊ីលមិនបានជោគជ័យរបស់កូរ៉េខាងជើង។ ចំណែកលោកអនុរដ្ឋមន្ត្រីការបរទេសកូរ៉េខាងជើងខាងលើបានលើកឡើងថា បើអាមេរិកហ៊ានវាយប្រហារពួកយើងដោយកម្លាំងទ័ព នោះយើងនឹងតបតវិញដោយការប្រើមីស៊ីលរបស់ពួកយើងមិនឱ្យខុសសម្តីនោះទេ។

ចុងបញ្ចប់ រដ្ឋមន្ត្រីការបរទេសកូរ៉េខាងជើងបង្ហាញគោលជំហរថា ខ្លួនជឿជាក់លើអាវុធមីស៊ីលរបស់ខ្លួនថាវាអាចការពារការបៀតបៀនពីសហរដ្ឋអាមេរិកបាន។ គូសបញ្ជាក់ផងដែរថាស្ថានការណ៍រវាងប្រទេសបងប្អូនសម្ព័ន្ធមិត្តអាមេរិកជាមួយនឹងសហរដ្ឋអាមេរិកពេលនេះកំពុងតែតានតឹងដោយមានការបោះសម្តីគម្រាមគ្នាទៅវិញទៅមកពីមន្ត្រីជាន់ខ្ពស់ក្នុងជួរកងទ័ពរៀងៗខ្លួន។ រីឯដំណោះស្រាយនៅដែលអាចទទួលយកបានមួយនៅមិនទាន់ចេញមកនៅឡើយទេ៕

ប្រភព៖ bbc