អាមេរិកជន្លឆ្វេង កូរ៉េខាងជើង​ជន្ល​ស្តាំ រុស្ស៊ី​ត្រៀម​ក្រញាំ ចិន​ហក់​មក​កណ្តាល​ថា​កុំ​អាល​ស្តាប់​គ្នា​សិន!

ភាពតានតឹងកំពុងតែបន្តទៅមុខ ព្រោះម្ខាងៗទាំងកូរ៉េខាងជើង និងសហរដ្ឋអាមេរិកសុទ្ធសឹងកំពុងតែតម្លើងសរសៃកដាក់គ្នាមិនឈប់ប្រៀបដូចជាមាន់អួតដាក់គ្នាក្នុងពេលឱ្យទឹកមុនជល់អញ្ចឹងដែរ។ កន្លងមក កូរ៉េខាងជើងធ្លាប់បានសាកល្បងបាញ់គ្រាប់មីស៊ីលទាំងតូចធំរបស់ខ្លួនជាច្រើនរាប់មិនអស់មកហើយចាប់តាំងតែពីជម្លោះ និងការបោះសម្តីដាក់គ្នាទៅវិញទៅមកចាប់កើតមានឡើង។ ថ្វីបើអាមេរិកធ្លាប់ហាមប្រាមហើយថាកុំឱ្យកូរ៉េបន្តការសាកល្បង និងកម្មវិធីបរមាណូរបស់ខ្លួនទៀត តែកូរ៉េខាងជើងឯនេះវិញហាក់មិនខ្ចីខ្វល់នឹងនរណាសោះតែម្តង ពោលគឺអ្វីដែលខ្លួនចង់ធ្វើ គឺតែងតែធ្វើដោយមិនក្រែងសូម្បីតែបន្តិច។

ទាំងនេះអាចបញ្ជាក់បានថាជាការពើងទ្រូងមួយរបស់កូរ៉េដាក់ប្រទេសមហាអំណាចដែលជាម្ចាស់ពិភពគុនហើយ។ តែអាមេរិកឯនេះវិញក៏មានវិធានការណ៍របស់ខ្លួនដែរ ពោលគឺបានបញ្ជូននាវាយក្សរបស់ខ្លួនមកធ្វើសមយុទ្ធជាមួយអតីតសត្រូវបច្ចុប្បន្នសម្ព័ន្ធមិត្តជប៉ុន ហើយថែមទាំងឆ្ពោះទៅកាន់ដែនទឹកក្បែរឧបទ្វីបកូរ៉េថែមទៀតផង។ ក្រៅពីនេះ ក្នុងថ្ងៃដែលកូរ៉េខាងជើងបាញ់មេឃក្នុងទ្រង់ទ្រាយធំ អាមេរិកក៏បានធ្វើតែស្តសាកល្បងគ្រាប់រ៉ុកកែតរបស់ខ្លួនផងដែរ។

 

រុស្ស៊ីឯនេះវិញ ដោយសារខ្លាចអាមេរិកបំពានលើសម្ព័ន្ធមិត្តរបស់ខ្លួន ក៏បានបញ្ជូនទាំងកងទ័ព និងសព្វាវុធយ៉ាងសន្ធឹកសន្ទាប់មកកាន់តំបន់ព្រំដែនរវាងខ្លួន និងកូរ៉េខាងជើងជាស្រេចរួចហើយផងដែរ។ ស្រាប់តែម្សិលមិញនេះ សម្ព័ន្ធយុវជនកូរ៉េខាងជើងមានប្តេជ្ញាថា នឹងប្រើកុមារទម្លាក់គ្រាប់បែកកម្ទេចកូរ៉េខាងជើង និងអាមេរិកឱ្យខ្ទេចជាផេះតែម្តង។ ដោយឃើញទាំងកូរ៉េ រុស្ស៊ី និងអាមេរិកហាក់ត្រៀមជើងការណ៍រៀងៗខ្លួនហើយនោះ ចិនបានចេញមុខមកធ្វើជាអាជ្ញាកណ្តាលដោយប្រាប់ឱ្យគូវិវាទកូរ៉េខាងជើង និងអាមេរិក គួរតែផ្អាកបង្អួតពីរឿងអាវុធរៀងៗខ្លួនសិន ដោយងាកមករចរចារកច្រកចេញដ៏សមរម្យមួយវិញទើបជាការល្អ។ 

លោក Wang Yi រដ្ឋមន្ត្រីការបរទេសចិនលើកឡើងថា បើទោះជាប្រយុទ្ធគ្នា​កូរ៉េខាងជើង និងអាមេរិកពិតជានឹងរកអ្នកចាញ់ឈ្នះមិនឃើញនោះទេ ព្រោះម្ខាងៗសុទ្ធតែមានសព្វាវុធទំនើបៗដូចគ្នា។ ផ្ទុយទោវិញ ប្រទេសទាំងពីរពិតជានឹងខាតបង់ទាំងសងខាង បើហ៊ានតែប៉ះគ្នាដោយសព្វាវុធ។ បើប្រទេសទាំងពីរព្រមងាកមកធ្វើការចរចាគ្នាដោយទុករឿងបង្អួតអាវុធសិន នោះប្រទេសចិននឹងជួយសម្រួលពីរឿងនេះតាមអ្វីដែលចិនអាចធ្វើទៅបាន។ 

ការដែលចិនចង់ឱ្យប្រទេសទាំងពីរចរចាគ្នានេះគឺមកពីចិន និងកូរ៉េខាងជើងជាសម្ព័ន្ធមិត្ត និងថថែមទាំងជាដៃគូពាណិជ្ជកម្មដ៏សំខាន់នឹងគ្នាថែមទៀតផង។ បើសិនជារដ្ឋាភិបាលក្រុមព្យុយ៉ាង ដួលរលំទៅ នោះការរកស៊ីជាមួយគ្នាពិតជានឹងត្រូវខកខានដែលជាហេតុធ្វើឱ្យមានវិបត្តិក្នុងស្រុកបណ្តាលមកពីការគ្មានទីផ្សារនាំផលិតផលចេញជាមិនខាន។ ម្យ៉ាងទៀត បញ្ហាជនភៀសខ្លួននៅតំបន់ព្រំដែនរួម ព្រមទាំងរឿងរ៉ាវឈឺក្បាលជាច្រើនទៀតផងដែរ។ ចាំមើលថាតើសហរដ្ឋអាមេរិគ និងកូរ៉េខាងជើងព្រមងាកមកចរចាគ្នាតាមសម្តីចិនសំណូមពរដែរទេ? 

ប្រភព៖ latimes