មិននឹកស្មានថាលោក វ្លាឌីមៀ ពូទីន លេងព្យាណូយ៉ាងពីរោះបែបនេះសោះហើយ!

មេដឹកនាំប្រទេសធំៗជាច្រើននៅលើពិភពលោកបានមកជួបជុំគ្នានៅក្រុងប៉េកាំង ប្រទេសចិនដើម្បីពិភាក្សាលើប្រធានបទ "ខ្សែក្រវាត់មួយ ផ្លូវមួយ" ។ ការអញ្ជើញមេដឹកនាំពិភពលោកមកក្រុងប៉េកាំងនេះក្នុងគោលបំណងបង្កើតហេដ្ឋារចនាសម្ព័ន្ធ និងដើម្បីបង្កើតការលូតលាស់សេដ្ឋកិច្ចក្នុងបណ្តាប្រទេសចំនួន ៦០ ។ ក្នុងចំណោមមេដឹកនាំដែលមានឥទ្ធពលទាំងនោះ ក៏មានវត្តមានលោកប្រធានាធិបតីរុស្ស៊ី វ្លាឌីមៀ ពូទីន ផងដែរ។ កន្លងមក គ្រប់គ្នាពិតជាដឹង និងស្គាល់យ៉ាងច្បាស់ពីចំណុចរឹងរបស់បុរសខ្លាំងម្នាក់នេះ និងគ្មានអ្នកណាដឹង និងដែលឃើញពីចំណុចទន់របស់គាត់ឡើយ។

តែកាលពីថ្ងៃអាទិត្យកន្លងទៅនេះខណៈកំពុងរង់ចាំជួបលោកប្រធានាធិបតីចិន Xi Jingping លោកពូទីន បានបង្ហាញចំណុចទន់របស់លោកឱ្យគ្រប់គ្នាបានឃើញ និងឮផ្ទាល់នឹងត្រចៀក។ ថ្ងៃនោះលោកពូទីន បានលេងព្យាណូ ២ បទយ៉ាងពីរោះឱ្យគ្រប់គ្នាស្តាប់ ដែលបទទី១ មានចំណងជើងថា "Moscow Windows" និងបទទី ២ "Evening Song" ។ នេះមិនមែនទើបតែលើកទី ១ នោះទេដែលលោក ពូទីន បានបង្ហាញពីចំណុចនេះ។ កាលពីឆ្នាំ ២០១០ លោកក៏ធ្លាប់បានធ្វើឱ្យទស្សនិកជនជាច្រើនហ៊ោរកញ្ច្រៀវម្តងរួចមកហើយផងដែរដោយលោកបានលេងព្យាណូ និងច្រៀងបទ "Blueberry Hills" ក្នុងព្រឹត្តិការណ៍សប្បុរសធម៌មួយផងដែរ៕